शरद पवार माझे मार्गदर्शक; गौतम अदानींकडून पवारांचं कौतुक

गौतम अदानींनी शरद पवारांना आपले मार्गदर्शक असल्याचे जाहीर करत बारामतीच्या विकासासाठी त्यांच्या योगदानाची प्रशंसा केली. बारामती येथील विद्या प्रतिष्ठान शरदचंद्र पवार आर्टिफिशियल इंटेलिजन्स सेंटर ऑफ एक्सलन्सच्या उद्घाटन समारंभात अदानींनी पवारांच्या तीन दशकांच्या मार्गदर्शनाबद्दल कृतज्ञता व्यक्त केली.

ते म्हणाले की, पवार साहेबांनी बारामतीला केवळ स्थानिक विकासाचे केंद्र न ठेवता, कृषी, सहकार, शिक्षण आणि उद्योजकतेला प्रोत्साहन देऊन भारतासाठी एक आदर्श मॉडेल बनवले आहे. त्यांच्या मते, पवारांनी केवळ बारामतीच नव्हे, तर राष्ट्रीय स्तरावर कृषी धोरण आणि अन्नसुरक्षा यामध्ये महत्त्वाची भूमिका बजावली आहे.

अदानींनी कृत्रिम बुद्धिमत्तेच्या (AI) सामर्थ्यावरही भर दिला. त्यांनी नमूद केले की, तंत्रज्ञान नेहमीच नवीन संधी निर्माण करते आणि चौथी औद्योगिक क्रांती असलेल्या AI मुळे भारत अभूतपूर्व प्रगती करेल. AI शेतकऱ्यांपासून ते गृहिणींपर्यंत सर्वांना सक्षम करेल आणि देशाच्या प्रत्येक कोपऱ्यात क्षमता, निर्णयक्षमता आणि उत्पादकता वाढवेल, असे अदानींनी सांगितले.