मुंबई-पुणे एक्स्प्रेस वेवर मोठी वाहतूक कोंडी, वाहतूक मंदावल्याने प्रवाशांना त्रास!

खालापूर टोलनाक्याजवळ मुंबई-पुणे एक्सप्रेस वेवर मुसळधार पावसामुळे मोठी वाहतूक कोंडी निर्माण झाली. सतत कोसळणाऱ्या पावसामुळे महामार्गाच्या काही भागांमध्ये मोठ्या प्रमाणात पाणी साचले. त्यामुळे वाहनचालकांना मोठा त्रास सहन करावा लागला. अनेक वाहनांचा वेग मंदावल्याने काही काळ वाहतूक संथ गतीने सुरू होती.

याचदरम्यान, महामार्गालगत असलेल्या एका फूड मॉलमध्येही पावसाचे पाणी शिरल्याची घटना समोर आली. अचानक पाणी शिरल्याने ग्राहक आणि कर्मचाऱ्यांची धावपळ उडाली. काही लोकांनी मोबाईलमध्ये या घटनेचे व्हिडीओ चित्रित केले. सोशल मीडियावर हे व्हिडीओ मोठ्या प्रमाणात व्हायरल होत आहेत.

हवामान विभागाने पुढील काही तासांतही जोरदार पावसाचा इशारा दिला आहे. प्रशासनाकडून नागरिकांना विनाकारण प्रवास टाळण्याचे आवाहन करण्यात आले आहे. तसेच घाट परिसरात वाहन चालवताना काळजी घेण्याच्या सूचना देण्यात आल्या आहेत. मुसळधार पावसामुळे मुंबई-पुणे एक्सप्रेस वेवरील परिस्थिती सध्या चिंताजनक बनली आहे.