West Bengal Rains :पश्चिम बंगालमध्ये निसर्गाचा प्रकोप, पावसानं 13 जणांचा बळी, दार्जिलिंगमध्ये भूस्खलन अन् पूल कोसळला

पश्चिम बंगालमध्ये झालेल्या मुसळधार पावसामुळे जनजीवनावर गंभीर परिणाम झाला आहे. या नैसर्गिक आपत्तीत एकूण 13 लोकांचा मृत्यू झाला आहे. पावसामुळे दार्जिलिंग जिल्ह्यात भूस्खलनाच्या घटना घडल्या आहेत, ज्यात मिरिक आणि सुखिया हे भाग प्रामुख्याने बाधित झाले आहेत.  मिरिकमध्ये झालेल्या भूस्खलनामुळे 9 जणांनी आपला जीव गमावला आहे, तर सुखियामध्ये 4 जणांचा मृत्यू झाल्याची नोंद आहे. याव्यतिरिक्त, पावसामुळे मोठ्या प्रमाणात हानी झाली असून, वाहतुकीवरही परिणाम झाला आहे.

सिलिगुडी आणि मिरिक या दोन महत्त्वाच्या शहरांना जोडणारा बालासन नदीवरील लोखंडी पूल कोसळला आहे. यामुळे या मार्गावरील वाहतूक थांबली असून नागरिकांना अडचणींचा सामना करावा लागत आहे. स्थानिक प्रशासनाकडून मदत आणि बचावकार्य सुरू करण्यात आले आहे. पावसामुळे निर्माण झालेल्या स्थितीवर सरकारकडून लक्ष ठेवले जात आहे.