Heavy Rain | कल्याण-डोंबिवलीत पुन्हा पावसाचा कहर! अचानक मुसळधार सरींनी नागरिकांची धावपळ

विश्रांतीनंतर कल्याण-डोंबिवली परिसरात पावसाने पुन्हा एकदा जोरदार हजेरी लावली आहे. अचानक झालेल्या मुसळधार सरींमुळे जनजीवन विस्कळीत झाले असून, कल्याणमधील छत्रपती शिवाजी महाराज चौक परिसरात खरेदीसाठी आलेल्या नागरिकांची एकच धावपळ उडाल्याचे चित्र पाहायला मिळाले.

अचानक सुरू झालेल्या पावसामुळे अनेक नागरिकांनी दुकाने, इमारती आणि आडोशांचा आसरा घेतला. काही वेळातच प्रमुख रस्त्यांच्या कडेला पाणी साचण्यास सुरुवात झाली, त्यामुळे वाहनचालकांनाही अडचणींचा सामना करावा लागला.

मुसळधार पावसामुळे शहरातील प्रमुख मार्गांवरील वाहतुकीचा वेग मंदावला असून, काही ठिकाणी किरकोळ वाहतूक कोंडीचीही परिस्थिती निर्माण झाली. प्रशासन परिस्थितीवर लक्ष ठेवून असून, पावसाचा जोर कायम राहिल्यास आवश्यक ती उपाययोजना करण्यात येणार असल्याची माहिती देण्यात आली आहे.

दरम्यान, हवामान विभागाने पुढील काही तासांतही पावसाची शक्यता व्यक्त केली असून, नागरिकांनी अत्यावश्यक कामाशिवाय बाहेर पडणे टाळावे, तसेच पाणी साचलेल्या रस्त्यांवरून जाताना खबरदारी घ्यावी, असे आवाहन प्रशासनाकडून करण्यात आले आहे.