राहुल-प्रियांका गांधींच्या ताब्याचे पडसाद; कल्याणमध्ये युवक काँग्रेसचा रेल रोको, कार्यकर्ते ताब्यात

राहुल गांधी आणि प्रियांका गांधी यांना ताब्यात घेतल्याच्या निषेधार्थ कल्याणमध्ये युवक काँग्रेसने तीव्र आंदोलन केले. कल्याण रेल्वे स्थानकावर युवक काँग्रेसचे पदाधिकारी आणि कार्यकर्त्यांनी रेल रोको करण्याचा प्रयत्न केला. यावेळी आंदोलनकर्त्यांनी सरकारविरोधात जोरदार घोषणाबाजी करत आपला संताप व्यक्त केला. या आंदोलनादरम्यान पोलिसांनी तात्काळ कारवाई करत आंदोलनकर्त्यांना ताब्यात घेतले. मात्र, युवक काँग्रेसने आपला निषेध कायम ठेवला आहे. एका आंदोलकाने सांगितले की, “निवडणूक आयोग ही भाजपची खासगी संस्था बनली आहे, ज्याला आम्ही इलेक्शन कमिशन ऑफ बीजेपी असे नाव दिले आहे.” त्यांनी पुढे म्हटले की, “आमचा आवाज दाबला जाणार नाही, उलट तो अधिक मोठा होईल.

जनतेचे प्रश्न आणि लोकशाहीला जेव्हापर्यंत हे लोक कमजोर करण्याचा प्रयत्न करतील, तोपर्यंत आम्ही त्यांना कठोर उत्तर देऊ.” या घटनेमुळे कल्याणमध्ये काही काळ तणावाची स्थिती निर्माण झाली होती. युवक काँग्रेसने लोकशाही मूल्यांचे रक्षण करण्याची आणि जनतेच्या हितासाठी संघर्ष करण्याची आपली भूमिका पुन्हा एकदा अधोरेखित केली. जय हिंद, जय महाराष्ट्र च्या घोषणा देत आंदोलनकर्त्यांनी आपला निर्धार व्यक्त केला.