20 तासांपासून लालबागच्या राजाची मिरवणूक सुरू… आणखी विलंब होण्याची शक्यता, नेमकं कारण समोर

मुंबईतील गणेशोत्सवाचा केंद्रबिंदू असलेल्या लालबागच्या राजाच्या विसर्जन मिरवणुकीला समुद्राला आलेल्या ओहोटीमुळे काही प्रमाणात विलंब होण्याची शक्यता वर्तवली जात आहे. मिळालेल्या माहितीनुसार, आज समुद्राला पहिली ओहोटी सकाळी ५ वाजून २२ मिनिटांनी आली होती. त्यामुळे आता लालबागच्या राजाचे विसर्जन सकाळी ११ वाजून ३० मिनिटांनंतर होण्याची शक्यता आहे. सध्या लालबागचा राजा ओपेरा हाऊस परिसरात पोहोचला असून, गिरगाव चौपाटीकडे त्याचा प्रवास सुरू आहे. गिरगाव चौपाटीवर बाप्पाच्या आगमनाची आतुरतेने वाट पाहणाऱ्या लाखो भाविकांनी गर्दी केली आहे.

भक्तीचा महासागर येथे उसळला असून, प्रत्येकजण आपल्या लाडक्या राजाच्या अंतिम दर्शनासाठी डोळे लावून बसला आहे. अनेक तासांपासून सुरू असलेली ही भव्य मिरवणूक आता अंतिम टप्प्यात आली आहे. चिंचपोकळीच्या चिंतामणीसह इतरही अनेक छोट्या-मोठ्या सार्वजनिक गणपतींचे विसर्जन याच ठिकाणी होणार असल्याने, चौपाटीवर उत्साहाचे आणि निरोपाचे वातावरण आहे. भाविकांच्या चेहऱ्यावर बाप्पाला निरोप देण्याचे दुःख असले तरी, पुढच्या वर्षी लवकर या या घोषणेने त्यांचा उत्साह कायम आहे.