Maharashtra budget : वाह दादा! अजित पवारांच्या शायरीला सत्ताधा-यांसह विरोधकांची दाद अन् सभागृहात म्हणाले, सुभानअल्लाह म्हणायचं नाही…

प्रत्‍येक व्यक्तीला त्याच्या घरापासून 5 किलोमीटरच्या परिघात दर्जेदार प्राथमिक आरोग्य सेवा उपलब्ध व्हावी, यासाठी विशेष कार्यक्रम हाती घेण्यात येणार आहे. आयुष्मान भारत- प्रधान मंत्री जनआरोग्य योजनेची ओळखपत्रे कालबध्द पद्धतीने वितरित करण्यात येणार असून महात्मा फुले जनआरोग्य योजनेत अंगीकृत रुग्‍णालयांच्या संख्येत आवश्यकतेनुसार वाढ करण्यात येणार आहे. ठाणे येथे 200 खाटांचे, रत्‍नागिरी जिल्ह्यात १०० खाटांचे संदर्भ सेवा रुग्‍णालय आणि रायगड जिल्ह्यात २०० खाटांचे अतिविशेषोपचार रुग्‍णालय उभारण्यात येत असल्याचे अजित पवार यांनी अर्थसंकल्प सादर करताना सांगितले. तर स्वर्गीय बाबा आमटे आणि साधनाताई आमटे यांनी स्थापन केलेल्या महारोगी सेवा समितीच्या अमृतमहोत्सवी वर्षपूर्ती निमित्ताने “आनंदवन”ला देण्यात येणाऱ्या प्रतिरुग्ण पुनर्वसन अनुदानात भरीव वाढ करण्यात येणार असून राज्यातील मागासवर्गीय व दुर्बल घटकांसाठी निवारा, वीज, पाणी, आरोग्य, शिक्षण, पोषण तसेच रोजगारासाठी योजना राबविण्यात राज्य अग्रेसर असून महायुती सरकार या घटकांचा जीवनस्तर उंचावण्यासाठी कटीबध्द असल्याचे अजित पवार म्हणाले. यावेळी त्यांनी काही यमक ओळी बोलून दाखवल्या. यानंतर सभागृहातून एकच वाह दादा! वाह दादा! असं म्हणत अजित दादांच्या शायरीला सत्ताधा-यांसह विरोधकांनी दाद दिल्याचे पाहायला मिळाले.