महाराष्ट्रात बुलेट ट्रेन प्रकल्पाचा महत्त्वाचा टप्पा, पहिला स्टील पूल उभारला

महाराष्ट्रामध्ये बुलेट ट्रेन प्रकल्पाने एक महत्त्वाचा टप्पा गाठला आहे. मुंबई-अहमदाबाद हाय स्पीड रेल कॉरिडॉरवरील महाराष्ट्रातील पहिला स्टीलचा पूल भिवंडी तालुक्यातील दिवे गावाजवळ यशस्वीरित्या बसवण्यात आला आहे. मुंबई-नाशिक महामार्गावरील दिवे-अंजूर या ठिकाणी हा 100 मीटर लांबीचा पूल उभारण्यात आला आहे. नॅशनल हाय स्पीड रेल कॉर्पोरेशन (NHSRCL) द्वारे राबवल्या जात असलेल्या या प्रकल्पातील हा पूल 1,405 मेट्रिक टन वजनाचा असून, तो पूर्णपणे स्टीलपासून बनवलेला आहे.

तामिळनाडू राज्यातील त्रिची येथील वर्कशॉपमध्ये या पुलाचे भाग तयार करण्यात आले होते. त्यानंतर ते भाग भिवंडी येथे आणून, रात्रीच्या वेळेस ते जोडून हा महाकाय पूल बसवण्यात आला. वाहतुकीला कमीत कमी अडथळा निर्माण व्हावा या हेतूने रात्रीच्या वेळी ही विशेष मोहीम पार पडली. या पुलामुळे बुलेट ट्रेन प्रकल्प आता प्रत्यक्षात येताना दिसत आहे. हा पूल मुंबई-अहमदाबाद बुलेट ट्रेन मार्गावर एक महत्त्वाचे बांधकाम आहे, जो भविष्यातील वेगवान प्रवासाचा मार्ग सुकर करेल.