बोगस आधारकार्ड तयार करून मतदान केलं जातंय; पडळकरांचा गंभीर आरोप

भाजप नेते गोपीचंद पडळकर यांनी मतदार यादीतील बोगस मतदारांचा मुद्दा उपस्थित करत, बनावट आधारकार्ड वापरून मतदान केले जात असल्याचे गंभीर निरीक्षण नोंदवले. मतदार, मृत मतदार, स्थलांतरित मतदार आणि घुसखोर मतदार यांच्यामुळे लोकशाहीला धोका निर्माण होत असल्याचे त्यांनी सांगितले. घुसखोर व्यक्ती मोठ्या प्रमाणावर बनावट आधारकार्ड तयार करून मतदार यादीत आपली नावे समाविष्ट करत आहेत. या चुकीच्या पद्धतीने मतदार यादीत घुसलेल्या नावांना दूर करण्यासाठी केंद्र आणि राज्य सरकारने हाती घेतलेले काम अत्यंत चांगले असल्याचे पडळकर यांनी म्हटले.

भाजप आपल्या कार्यकर्त्यांना मतदार यादी शुद्धीकरणाविषयी सविस्तर प्रशिक्षण देत आहे. काही राज्यांमध्ये या मतदार याद्या शुद्ध झाल्या असून, लाखांच्या संख्येने मते कमी झाली आहेत. घुसखोर बांगलादेशी, रोहिंग्या किंवा अन्य घुसखोरांचा मतदार यादीत समावेश होणे हे लोकशाहीसाठी घातक आहे. अशा सर्व चुकीच्या मतदारांना दूर करणे आवश्यक आहे. अनेकदा मृत व्यक्तींची नावे तीस-तीस वर्षे यादीत असतात, किंवा दुबार मतदार दोन्ही ठिकाणी मतदान करतात. वीस-तीस वर्षांपासून पत्त्यावर नसतानाही मतदानाच्या दिवशी कोणीतरी बोगस आधारकार्ड वापरून मतदान करण्यास येते. हे मतदार यादी शुद्धीकरण लोकशाहीच्या दृष्टीने अत्यंत पवित्र काम आहे, असे पडळकर यांनी नमूद केले.