मुख्यमंत्री फडणवीसांमुळे शेतकऱ्यांची दिवाळी गोड होणार… बड्या नेत्याचं विधान चर्चेत

महाराष्ट्रातील शेतकऱ्यांना मोठ्या प्रमाणात पीक नुकसानीचा सामना करावा लागत आहे. मूग, उडीद, बाजरी, सोयाबीन आणि तूर यांसारखी पिके पूर्णतः खराब झाली आहेत. यासोबतच कांदा आणि ऊस पिकांचेही मोठे नुकसान झाले असून, त्यांनाही नुकसान भरपाईच्या कक्षेत आणण्याची मागणी होत आहे. आष्टी, पाटोदा आणि शिरूर तालुक्यांमधील फळबाग धारक शेतकरीही संकटात आहेत, त्यांना पुढील आठ महिने फळबागा जगवण्यासाठी विशेष सरकारी मदतीची गरज आहे. जनावरांच्या चाऱ्याचा प्रश्नही गंभीर बनला असून, चारा डेपो किंवा थेट अनुदानाची मागणी पुढे आली आहे. या पार्श्वभूमीवर, आमदार सुरेश धस यांनी जिल्हाधिकारी व तहसीलदारांसोबत संवाद साधून नुकसानग्रस्त पिकांचे पंचनामे करण्याच्या सूचना दिल्या आहेत.

मुख्यमंत्री देवेंद्र फडणवीस यांनी दसरा ते दिवाळी या कालावधीत शेतकऱ्यांना मदत करण्याचे आश्वासन दिले आहे. परवा लातूरमध्ये बोलताना त्यांनी प्रति हेक्टरी ७,५०० रुपये मदत मिळेल असे स्पष्ट केले आहे. या निर्णयामुळे शेतकऱ्यांची दिवाळी गोड होणार असून, त्यांना काहीसा दिलासा मिळणार आहे.