संजय राऊतांच्या राज्यसभा रणनीतीवर नवनाथ बन यांच्याकडून प्रश्नचिन्ह

महाराष्ट्रातील राजकीय वर्तुळात सध्या राज्यसभा निवडणुकीवरून जोरदार चर्चा सुरू आहे. भाजप प्रवक्ते नवनाथ बन यांनी पत्रकार परिषदेत उबाठा गटाचे खासदार संजय राऊत यांच्या भूमिकेवर प्रश्नचिन्ह उपस्थित केले. राऊत यांना प्रियंका चतुर्वेदी राज्यसभेवर निवडून येऊ नये असे वाटत असून, त्यासाठी ते शरद पवारांचे नाव पुढे करत असल्याचा आरोप करण्यात आला. यामुळे उबाठा गटाला राज्यसभेची जागाच मिळू नये अशी त्यांची इच्छा असल्याचे वक्तव्य नवनाथ बन यांनी केले.

नवनाथ बन यांनी पुढे म्हंटले की, संजय राऊत यांची राज्यसभा खासदारकीची मुदत लवकरच संपणार असल्याने, प्रियंका चतुर्वेदी निवडून आल्यास आपली संधी जाईल अशी भीती त्यांना वाटत असावी. दुसरीकडे, आदित्य ठाकरे यांनी रोटेशन पद्धतीनुसार उबाठा गटाला राज्यसभेवर संधी मिळावी अशी मागणी केली आहे. यावरून उबाठा गटातील अंतर्गत मतभेद समोर आले आहेत. संजय राऊत मराठी कार्ड वापरून प्रियंका चतुर्वेदींचा पत्ता कट करण्याचा प्रयत्न करत असल्याचेही प्रवक्त्यांनी म्हटले.

या पत्रकार परिषदेत, एकनाथ शिंदे यांनी बाळासाहेब ठाकरे यांचे विचार जिवंत ठेवल्याचा दावा करत, उद्धव ठाकरे यांनी काँग्रेससोबत आघाडी करून बाळासाहेबांच्या विचारांशी गद्दारी केल्याचा आरोपही करण्यात आला.