Amravati : तुमच्या हातात येणारी 500 ची नोट नकली तर नाही ना! धक्कादायक प्रकार ऐकून पायाखालची जमीनच सरकेल!

अमरावती जिल्ह्यात बनावट चलनाविरोधात नांदगावपेठ पोलिसांनी मोठी कारवाई केली आहे. या कारवाईत 500 रुपयांच्या बनावट नोटा मोठ्या प्रमाणात जप्त करण्यात आल्या आहेत. मिळालेल्या माहितीनुसार, आतापर्यंत एकूण 43,000 रुपयांच्या बनावट नोटा पोलिसांनी हस्तगत केल्या आहेत. ही कारवाई नांदगावपेठ पोलिसांच्या सतर्कतेमुळे शक्य झाली असून, यामुळे बनावट चलन बाजारात येण्यापासून रोखण्यात यश आले आहे.

पोलिसांनी जप्त केलेल्या नोटांची संख्या पाहता, यामागे मोठे रॅकेट असण्याची शक्यता वर्तवण्यात येत आहे. या प्रकरणी सखोल तपास सुरू असून, या कारवाईतून बनावट नोटांच्या निर्मिती आणि वितरणाशी संबंधित मोठ्या साखळीचा पर्दाफाश होण्याची शक्यता आहे. या घटनेमुळे अमरावती आणि आसपासच्या परिसरात खळबळ उडाली आहे. पोलीस या प्रकरणाचा तपास अधिक बारकाईने करत आहेत.