संक्रातिनिमित्त नाशिकच्या गोदा घाट परिसरात पर्यटक, भाविकांची गर्दी

मकर संक्रांतीचा सण आज संपूर्ण देशभरात उत्साहात साजरा होत आहे. सूर्य मकर राशीत प्रवेश करत असल्यामुळे उत्तरायणाचा प्रारंभ या दिवसापासून होतो, ज्याला हिंदू धर्मशास्त्रानुसार अनन्यसाधारण महत्त्व आहे. याच निमित्ताने तीर्थ स्नानासाठी नाशिकच्या गोदाघाट परिसरातील रामकुंडाच्या पवित्र डोहात हजारो पर्यटक आणि भाविक दाखल झाले आहेत. पहाटेपासूनच गोदाघाट परिसर भाविकांनी तुडुंब भरलेला असून, स्नानासाठी मोठ्या रांगा लागल्या आहेत.

या प्रचंड गर्दीचे नियोजन करण्यासाठी पोलीस प्रशासनाने विशेष बंदोबस्त तैनात केला आहे. एका बाजूला भाविकांची गर्दी, तर दुसरीकडे आगामी निवडणुकांमुळे उमेदवारांची प्रचाराची आणि घरोघरी भेटी देण्याची धावपळ सुरू आहे. या उत्साहाच्या वातावरणात नाशिककरांचा पतंग उडवण्याचा आनंदही विशेष लक्ष वेधून घेत आहे. अशा विविध पैलूंनी भरलेला हा संक्रांतीचा सण नाशिकमध्ये मोठ्या उत्साहात साजरा होत आहे.