Malegaon Abuse Case: चिमुकलीवर नराधमाकडून अत्याचार, राज्यभरात संताप; फाशीच्या मागणीसाठी मालेगावात भव्य मोर्चा

मालेगावमध्ये एका तीन वर्षांच्या चिमुकलीवर झालेल्या अत्याचार आणि तिच्या हत्येमुळे राज्यभरात संतापाची लाट उसळली आहे. या घटनेचा निषेध करत आणि आरोपीला कठोरात कठोर शिक्षा, विशेषतः फाशीची शिक्षा देण्याची मागणी करत मालेगावमध्ये आज भव्य मोर्चा काढण्यात आला. या मोर्चामध्ये महिला वर्गाचा मोठ्या संख्येने सहभाग होता, तसेच दादा भुसे देखील सहभागी झाले होते.

मालेगाव न्यायालयाच्या आवारात जोरदार घोषणाबाजी करत मोर्चेकऱ्यांनी आक्रमक स्वरूप धारण केले. संतप्त आंदोलकांनी न्यायालयाच्या इमारतीत शिरण्याचा प्रयत्न केला. पोलिसांनी त्यांना रोखण्यासाठी बळाचा वापर करत कोर्ट परिसर रिकामा करण्याचा प्रयत्न केला. गेट बंद करून मोर्चेकऱ्यांना आत जाण्यापासून परावृत्त करण्यात आले. या घटनेमुळे मालेगावात तणावाचे वातावरण निर्माण झाले होते, तरीही पोलिसांनी परिस्थिती नियंत्रणात ठेवली.