Jalna | जरांगेंच्या आंदोलनाला प्रचंड प्रतिसाद! वडीगोद्रीचं पार्किंग फुल्ल; हजारो आंदोलक पायी अंतरवालीकडे रवाना

जालना जिल्ह्यातील अंतरवाली सराटी येथे मराठा आरक्षणाच्या मागणीसाठी उपोषणाला बसलेले मनोज जरांगे पाटील यांच्या आंदोलनाचा आज सहावा दिवस आहे. त्यांना पाठिंबा देण्यासाठी राज्यभरातून मोठ्या संख्येने मराठा समाज बांधव अंतरवाली सराटीकडे येत आहेत. परिस्थिती अशी आहे की, वडीगोद्री येथे वाहनांसाठी केलेली पार्किंग पूर्णपणे भरली आहे.

वडीगोद्री येथील पार्किंग फुल झाल्याने, हजारो आंदोलक आता दीड ते दोन किलोमीटरचे अंतर पायी चालत अंतरवाली सराटीतील उपोषण स्थळाकडे जात आहेत. या दृश्यांमधून मनोज जरांगे पाटील यांना मिळत असलेला प्रचंड जनसमुदायाचा पाठिंबा स्पष्टपणे दिसत आहे. मराठा आरक्षणाच्या मागणीसाठी सुरू असलेल्या या आंदोलनाला व्यापक प्रतिसाद मिळत असून, आंदोलकांची वाढती गर्दी परिस्थितीचे गांभीर्य दर्शवते.