मनोज जरांगेंच्या उपोषणावर तोडगा निघणार? सरकारी शिष्टमंडळ अंतरवलीत दाखल

मराठा आरक्षणाच्या मागणीसाठी उपोषणाला बसलेले मनोज जरांगे पाटील यांची भेट घेण्यासाठी सरकारचे शिष्टमंडळ अंतरवलीमध्ये दाखल झाले आहे. मंत्री उदय सामंत आणि आमदार प्रसाद लाड हे या शिष्टमंडळाचे नेतृत्व करत असून, ते काही वेळातच जरांगे यांची भेट घेणार आहेत. विशेष म्हणजे, विखे पाटील आणि मकरंद पाटील हे छत्रपती संभाजीनगरमध्येच थांबले असून, विखे पाटील यांनी जरांगे यांच्या भेटीला जाणे टाळले आहे. जरांगे यांना भेटण्यापूर्वी सरकारी शिष्टमंडळाची तज्ज्ञ आणि अभ्यासकांसोबत महत्त्वपूर्ण चर्चा सुरू आहे.

मराठा आरक्षणासंदर्भात कायदेशीर आणि तांत्रिक बाबींवर विचारमंथन केले जात आहे. जरांगे पाटील यांनी सातारा आणि कोल्हापूर गॅझेटमधील नोंदींवर आधारित जीआर (सरकारी अध्यादेश) काढण्यासाठी सरकारला दोन दिवसांची अंतिम मुदत दिली आहे. या मुदतीत सरकारने सकारात्मक निर्णय घ्यावा अशी त्यांची मागणी आहे. आता हे शिष्टमंडळ जरांगे यांच्याशी काय चर्चा करते आणि यातून काही तोडगा निघतो का, याकडे महाराष्ट्राचे लक्ष लागले आहे.