Navnath Ban | राऊत आधी जनतेतून निवडून या! भाजप नेते नवनाथ बन यांचा संजय राऊतांवर घणाघात

भारतीय जनता पक्षाचे नेते नवनाथ बन यांनी पत्रकार परिषदेत शिवसेना (उद्धव बाळासाहेब ठाकरे) गटाचे खासदार संजय राऊत यांच्यावर तीव्र शब्दांत हल्ला चढवला. बन यांनी राऊतांवर टीका करताना म्हटले की, भाजप निवडणुका जिंकल्यास राऊत निवडणूक आयोगावर प्रश्नचिन्ह उपस्थित करतात, सर्वोच्च न्यायालयाचा निर्णय विरोधात गेल्यास त्याला चुकीचे ठरवतात आणि जीडीपीची आकडेवारी चांगली आल्यास ती खोटी असल्याचे सांगतात.

पंतप्रधान नरेंद्र मोदी यांच्या नेतृत्वाखालील देशाची अर्थव्यवस्था सक्षमपणे पुढे जात असताना, संजय राऊत केवळ राहुल गांधींची गुलामगिरी करत असल्याचा आरोप बन यांनी केला. देशाच्या आर्थिक प्रगतीवर शंका घेणे हे चुकीचे असल्याचे त्यांनी नमूद केले. राऊतांनी महाविकास आघाडीचे सरकार 25 वर्षे टिकवण्याची सुपारी घेतली होती, मात्र ती कशी फुटली, असा खोचक सवालही बन यांनी विचारला.

बन यांनी संजय राऊत आणि उद्धव ठाकरे यांच्या लोकशाहीतील सहभागावरही प्रश्नचिन्ह उपस्थित केले. जनतेतून कधीही निवडून न आलेले नेते लोकशाहीबद्दल बोलणे हा विनोद असल्याचे त्यांनी म्हटले. राऊतांनी आधी जनतेतून निवडून यावे, असे आव्हानही त्यांनी दिले.