Manoj Jarange Patil | गेल्या वर्षी परवानगी होती आणि आता कशी काय नाकारली?

मनोज जरांगे पाटील यांच्या मुंबईतील नियोजित आंदोलनाला मुंबई पोलिसांनी परवानगी नाकारली आहे. १९ तारखेला आझाद मैदानावर ५ हजार आंदोलकांसह आंदोलन करण्याची जरांगे पाटलांची योजना होती, मात्र पोलिसांनी ही परवानगी नाकारली आहे. आझाद मैदान परिसरातील रुग्णालये, रेल्वे स्थानके आणि शासकीय कार्यालयांमुळे ५ हजार आंदोलकांच्या उपस्थितीमुळे वाहतूक व्यवस्थेवर आणि रुग्णसेवेवर परिणाम होऊ शकतो, असे कारण पोलिसांनी दिले आहे. याव्यतिरिक्त, मागील आंदोलनावेळी निर्माण झालेला तणाव आणि उपोषण किंवा आत्मदहनाचा प्रयत्न न करण्याच्या नियमांचा दाखलाही देण्यात आला आहे. परवानगी नाकारल्यानंतरही मनोज जरांगे पाटील मुंबईला जाण्याच्या भूमिकेवर ठाम आहेत. “आम्ही मुंबईला जाणार, शांततेत जाणार,” असे त्यांनी स्पष्ट केले. गेल्या वर्षी परवानगी असताना यंदा नकार का, असा प्रश्न त्यांनी उपस्थित केला आहे.

सरकार मराठ्यांवर अन्याय करत असल्याचा आणि न्यायव्यवस्थेचा अपमान करत असल्याचा आरोप जरांगे पाटलांनी केला आहे. या प्रकरणी पुनर्विचार करून परवानगी द्यावी लागेल, असे जरांगे पाटील यांनी म्हटले आहे. १५ तारखेला जरांगे पाटील जालन्याच्या अंतरवाली सराटी येथून मुंबईच्या दिशेने निघणार आहेत.