Jalna : आम्ही मरावं की जगावं… दुष्काळी परिस्थितीबाबत सांगताना शेतकऱ्याला अश्रू अनावर

मराठवाड्यात दिवसेंदिवस दुष्काळाची दाहकता वाढत असून, जालना जिल्ह्यातील अंबड तालुक्यातील लोणार भायगाव परिसरात भीषण परिस्थिती निर्माण झाली आहे. गेल्या दीड महिन्यापासून पावसाने ओढ दिल्याने शेतकऱ्यांची प्रमुख पिके, विशेषतः सोयाबीन, अक्षरशः करपून गेली आहेत. उभ्या पिकांना शेंगाही लागलेल्या नाहीत आणि ती पूर्णपणे वाळून गेली आहेत. यामुळे शेतकऱ्यांसमोर मोठे आर्थिक संकट उभे राहिले आहे.

हवालदिल झालेल्या शेतकऱ्यांनी आपली व्यथा मांडताना, शासनाने तातडीने दुष्काळ जाहीर करावा आणि प्रति एकर एक लाख रुपये मदत द्यावी अशी मागणी केली आहे. प्रशासनातील कोणताही अधिकारी किंवा लोकप्रतिनिधी अद्याप आपल्या बांधावर फिरकले नसल्याची खंत शेतकऱ्यांनी व्यक्त केली. पिकाचे झालेले नुकसान पाहता, पंचनाम्याची गरज नसल्याचे त्यांचे म्हणणे आहे. गणेशोत्सवातही हीच परिस्थिती असल्याने दिवाळी कशी साजरी करायची, असा संतप्त सवाल शेतकरी विचारत आहेत. या गंभीर परिस्थितीत आता सरकार काय भूमिका घेते, याकडे सर्वांचे लक्ष लागले आहे.