Santosh Bangar : आमदारासमोर बळीराजानं फोडला टाहो अन् संतोष बांगर धावले मदतीला; म्हणाले, माझा शेतकरी उपाशी म्हणून आम्ही…

हिंगोली जिल्ह्यात गेल्या दोन दिवसांपासून सुरू असलेल्या मुसळधार पावसामुळे दांडेगाव शिवारासह अनेक गावांमध्ये पूरस्थिती निर्माण झाली आहे. शेतीचे मोठे नुकसान झाले असून, अनेक ठिकाणी जनावरे वाहून गेली आहेत. या गंभीर परिस्थितीची पाहणी करण्यासाठी कळमनुरी विधानसभेचे आमदार संतोष बांगर यांनी दांडेगाव येथे भेट दिली.

आमदार बांगर यांनी पूरग्रस्त शेतकऱ्यांना तातडीची मदत म्हणून अन्नधान्य किटचे वाटप केले. या किटमध्ये १० किलो पीठ, ५ किलो साखर, तेल, चहा पावडर आणि तांदूळ यांसारख्या जीवनावश्यक वस्तूंचा समावेश आहे. सरकारकडून हिंगोली जिल्ह्यासाठी २३१ कोटी रुपयांची मदत मंजूर झाली असून, त्यापैकी सव्वाशे ते दीडशे कोटी रुपये कळमनुरी आणि औंढा तालुक्यांसाठी आहेत, असे त्यांनी सांगितले. मात्र, ही मदत तुटपुंजी असून, शेतकऱ्यांसाठी किमान ५० हजार रुपये प्रति हेक्टरी मदत मिळावी अशी मागणी त्यांनी मुख्यमंत्री आणि उपमुख्यमंत्र्यांकडे केली. त्यांनी १०० टक्के नुकसानीची भरपाई देण्याचे आवाहन केले.