Navi Mumbai Airport Jobs: नवी मुंबई विमानतळात मराठी तरुणांना नोकरीतून डावललं? मनसेचा गंभीर आरोप काय?

नवी मुंबई विमानतळामुळे निर्माण होणाऱ्या नोकऱ्यांवरून महाराष्ट्र नवनिर्माण सेनेने (मनसे) गंभीर आरोप केले आहेत. विमानतळाच्या उद्घाटनावेळी भूमिपुत्रांना ८०% नोकऱ्या देण्याचे आश्वासन सरकारने दिले होते. मात्र, याच ठिकाणी मराठी तरुणांना नोकरीतून डावलले जात असल्याचा दावा मनसेने केला आहे.

टर्मिनल एकच्या उद्घाटनानंतर २५ हजार रोजगार उपलब्ध होणार आहेत. परंतु, किती मराठी तरुणांना नोकरी मिळाली, याबाबत सिडकोकडे माहितीच उपलब्ध नसल्याचे माहिती अधिकारात समोर आले आहे. याशिवाय, स्थानिक एजंट्सकडून विविध पदांवर नोकरीचे आमिष दाखवून लाखो रुपये उकळले गेल्याचाही आरोप मनसेने केला आहे.

मनसेने पुन्हा एकदा मागणी केली आहे की, नवी मुंबई विमानतळाच्या ठिकाणी स्थानिक आणि मराठी भाषिक तरुणांनाच ८०% भरती मिळाली पाहिजे. टर्मिनल एकमध्ये सध्याची २५,००० नोकरभरती असो किंवा भविष्यात चारही टर्मिनलमध्ये होणारी १ लाख रोजगारांची भरती असो, या सर्वांवर मनसे बारीक नजर ठेवून असल्याचे स्पष्ट केले आहे.