Dahi Handi in Mumbai | कालपर्यंत परवानगी, रात्री अचानक नकार! मनसे नेत्याच्या दहीहंडीला पोलिसांनी परवानगी नाकारली

मुंबईतील घाटकोपर येथे मनसे नेते गणेश चुक्कल यांनी आयोजित केलेल्या दहीहंडी उत्सवाला घाटकोपर पोलिसांनी ऐनवेळी परवानगी नाकारली आहे. दहीहंडीच्या स्टेजमुळे आपत्कालीन मार्ग बंद होणार असल्याचा अहवाल देत पोलिसांनी हे पाऊल उचलले आहे. पोलिसांनी परवानगी नाकारली असली तरी, दहीहंडी उत्सव होणारच असा ठाम निर्धार आयोजकांकडून व्यक्त करण्यात आला आहे.

अमृत नगर, घाटकोपर परिसरामध्ये गणेश चुक्कल यांच्याकडून दरवर्षी भव्य दहीहंडीचे आयोजन केले जाते. यंदाही त्याची जय्यत तयारी करण्यात आली होती आणि स्टेजही उभारण्यात आला होता. कालपर्यंत पोलीस आणि महापालिकेची परवानगी असताना, अचानक रात्री गणेश चुक्कल यांना परवानगी नाकारल्याचे पत्र मिळाले. या अचानक घेतलेल्या निर्णयामुळे आयोजकांमध्ये संताप व्यक्त होत आहे. पोलिसांनी दिलेल्या कारणाव्यतिरिक्त, यंदा उत्सवात झेंझींचा सत्कार करण्याचे आकर्षण ठेवल्याने परवानगी नाकारली गेली असावी, अशीही चर्चा सुरू आहे. सध्या आयोजक आणि पोलीस प्रशासनामध्ये तणावाची स्थिती निर्माण झाली आहे.