MNS On Narendra Mehata : मीरा-भाईंदरच्या ओळखीवरून राजकीय रणकंदन! हे जैनांचं नाही, आगरी-कोळी आणि मराठी बांधवांचं शहर; मनसेचा नेमका कोणाला टोला?

मीरा-भाईंदर शहराच्या ओळखीवरून भाजप आमदार नरेंद्र मेहता आणि महाराष्ट्र नवनिर्माण सेना यांच्यात वाद निर्माण झाला आहे. परमपूज्य दादा गुरुदेव यांच्या पुण्यतिथी कार्यक्रमात बोलताना नरेंद्र मेहता यांनी मीरा-भाईंदरला जैनांची नगरी असे संबोधले होते. शाळेत कांदा-लसूण (कंदमूळ) बंदी घालण्याच्या त्यांच्या भूमिकेवरही त्यांनी यावेळी जोर दिला.

मेहता यांच्या या वक्तव्यावर मनसेने तीव्र शब्दांत प्रत्युत्तर दिले आहे. मनसेने स्पष्ट केले की, मीरा-भाईंदर हे आगरी-कोळी आणि मराठी बांधवांचे शहर आहे. मनसेने नरेंद्र मेहता यांच्या दुहेरी भूमिकेवरही प्रश्नचिन्ह उपस्थित केले. शाळेमध्ये कंदमूळ चालत नाही असे म्हणणारे मेहता, त्यांच्या स्वतःच्या दोन हॉटेलमध्ये दारू आणि कंदमूळ विकतात, असा आरोप मनसेने केला. “शाळेत धर्म लागतो आणि व्यवसायात पैसे कमावण्यासाठी धर्म लागत नाही का?” असा सवाल विचारत मनसेने मेहतांवर डबल ढोलकी वाजवत असल्याची टीका केली. या प्रकरणामुळे मीरा-भाईंदरमधील राजकीय वातावरण तापले आहे.