पाडू मशीन कधी आणि का वापरणार? भूषण गगराणींनी सर्व सांगितलं

मुंबई महानगरपालिकेच्या आगामी निवडणुकांच्या पार्श्वभूमीवर पाडू मशीनच्या वापरावरून सुरू असलेल्या चर्चेला पालिका आयुक्त भूषण गगराणी यांनी स्पष्टीकरण दिले आहे. त्यांनी सांगितले की, मुंबईमध्ये पाडू मशीनचा वापर सरसकट केला जाणार नाही, तर ते केवळ अपवादात्मक परिस्थितीतच वापरले जाईल. विशेषतः, इलेक्ट्रॉनिक मतदान यंत्राला (EVM) तांत्रिक बिघाड आल्यास बॅकअप यंत्रणा म्हणून याचा उपयोग होईल.

महाराष्ट्र नवनिर्माण सेनेचे अध्यक्ष राज ठाकरे यांनी या यंत्रणेच्या वापराबाबत आक्षेप घेतले होते आणि राजकीय पक्षांना याबाबत माहिती न दिल्याचा प्रश्न उपस्थित केला होता. उद्धव ठाकरे यांनीही या संदर्भात पत्र पाठवले होते. यावर गगराणी यांनी स्पष्ट केले की, पालिकेच्या वतीने पूर्वी झालेल्या पत्रकार परिषदेत पाडू मशीनचे कार्य आणि डेमो दाखवण्यात आला होता. बंगळूरुच्या बीईएल (BEL) कंपनीने विकसित केलेले प्रिंटिंग ऑक्झिलरी डिस्प्ले युनिट (PADU) हे मशीन मतमोजणीच्या वेळी अतिरिक्त मदत म्हणून वापरले जाईल. मुंबईत फक्त एक टक्का ठिकाणीच याचा वापर होण्याची शक्यता आहे, असेही गगराणी यांनी नमूद केले.