Mumbai | गणेशोत्सवाआधी BMCचा मोठा निर्णय! रस्ते-पदपथ अडवणाऱ्या जाहिरात फलकांवर बंदी; उल्लंघन केल्यास कारवाई होणार

मुंबईमध्ये गणेशोत्सवाच्या पार्श्वभूमीवर बृहन्मुंबई महानगरपालिकेने (बीएमसी) जाहिरातींबाबत महत्त्वपूर्ण निर्बंध लागू केले आहेत. यंदाच्या गणेशोत्सवात शहरात कोणत्याही प्रकारची अनधिकृत किंवा अडथळा निर्माण करणारी जाहिरातबाजी सहन केली जाणार नाही, असे बीएमसीने स्पष्ट केले आहे.

या संदर्भात, बीएमसी आयुक्तांनी विशेष निर्देश जारी केले आहेत. रस्ते आणि पदपथांवर पादचाऱ्यांच्या वाहतुकीत अडथळा निर्माण करणाऱ्या सर्व जाहिरात फलकांना तात्काळ मनाई करण्यात आली आहे. अशा प्रकारचे अडथळे ठरणारे फलक, बॅनर किंवा इतर जाहिरात साधने तातडीने हटवण्याचे आदेश आयुक्तांनी दिले आहेत. नागरिकांना, तसेच उत्सव मंडळांना आवाहन करण्यात आले आहे की, त्यांनी नियमांचे पालन करावे आणि पादचाऱ्यांच्या सोयीसाठी सहकार्य करावे.

याशिवाय, गणेश विसर्जन झाल्यानंतर दुसऱ्या दिवशी सर्व जाहिरातदारांनी किंवा संबंधित घटकांनी आपले जाहिरात फलक स्वतःहून काढून टाकावे, असे आवाहनही बीएमसीने केले आहे. या नियमांचे उल्लंघन करणाऱ्यांवर कठोर कारवाई केली जाईल, असा इशाराही प्रशासनाने दिला आहे. गणेशोत्सव निर्विघ्न आणि सुरक्षितपणे पार पडावा, यासाठी बीएमसी प्रशासन कटिबद्ध आहे.