लालबागच्या गर्दीत धक्कादायक प्रकार! मुलांना सिल्व्हर पेंट लावून चक्क…

लालबागमध्ये मुलांना सिल्व्हर पेंट लावून भीक मागण्यासाठी वापरल्याप्रकरणी आता कारवाई करण्यात आली आहे. गणेशोत्सवाच्या गर्दीचा फायदा घेऊन मुलांकडून भीक मागवण्याचा हा धक्कादायक प्रकार मुंबईतील लालबाग परिसरात उघडकीस आला आहे. मिळालेल्या माहितीनुसार, दोन अल्पवयीन मुलांना संपूर्ण अंगाला सिल्व्हर रंग लावून सार्वजनिक ठिकाणी उभे करण्यात आले होते. या मुलांचा उपयोग करून एक ६५ वर्षीय महिला भाविकांकडून भीक मागत होती. ही घटना निदर्शनास येताच स्थानिक प्रशासनाने तात्काळ दखल घेतली.

मुलांचा गैरवापर होत असल्याचे लक्षात येताच पोलिसांनी त्वरित कारवाई केली. भीक मागण्यासाठी मुलांचा वापर करणाऱ्या ६५ वर्षीय महिलेला पोलिसांनी ताब्यात घेतले आहे. या घटनेमुळे समाजात मुलांच्या सुरक्षेबाबत आणि त्यांच्या शोषणाबद्दल पुन्हा एकदा चिंता व्यक्त केली जात आहे. या प्रकरणी काळचौकी पोलीस ठाण्यात संबंधित महिलेविरुद्ध गुन्हा दाखल करण्यात आला असून, पुढील तपास सुरू आहे. मुलांचा भीक मागण्यासाठी वापर करणे हा गंभीर गुन्हा असून, अशा घटना रोखण्यासाठी समाजाने अधिक जागरूक राहणे महत्त्वाचे आहे. गणेशोत्सवासारख्या पवित्र आणि उत्साहाच्या उत्सवामध्ये अशा प्रकारच्या घटना घडणे दुर्दैवी आहे.