शाब्बास रे पठ्ठ्या! लोकल ट्रेनमध्येच महिलेचं बाळंतपण; तरुणाने दाखवल धाडस अन्

मुंबईच्या राम मंदिर स्थानकावर एका महिला प्रवाशानं रात्रीच्या वेळी लोकल ट्रेनमध्ये मुलाला जन्म दिला. लोकल प्रवासादरम्यान महिलेची तब्येत अचानक बिघडली. यावेळी प्रवासी विकास बेडरे यांनी प्रसंगावधान राखत ट्रेनची साखळी ओढून ती थांबवली आणि वैद्यकीय मदतीची व्यवस्था करण्याचा प्रयत्न केला. मात्र रात्रीचा वेळ आणि स्थानकावर सुविधांची कमतरता यामुळे तातडीने मदत मिळाली नाही.

अशा स्थितीत, बेडरे यांनी त्यांची डॉक्टर मैत्रीण देविका देशमुख यांना व्हिडिओ कॉल केला. डॉ. देशमुख यांच्या ऑनलाइन मार्गदर्शनाखाली विकास बेडरे यांनी धैर्य दाखवत महिलेची प्रसूती यशस्वीपणे पार पाडली. या घटनेनंतर आई आणि बाळ दोघेही सुखरूप असल्याची माहिती आहे. विकास बेडरे आणि डॉ. देविका देशमुख यांच्या या कार्याबद्दल सर्व स्तरातून कौतुक होत आहे. ही घटना माणुसकी आणि तत्परतेचं एक उत्तम उदाहरण ठरली आहे.