Sanjay Raut | शरद पवारांनी इच्छा व्यक्त केली, त्यावर आम्ही निर्णय घेऊ; संजय राऊत स्पष्टच बोलले

राज्यसभेत खासदार म्हणून जाण्याची इच्छा राष्ट्रवादी काँग्रेसचे ज्येष्ठ नेते शरद पवार यांनी व्यक्त केल्याची चर्चा राजकीय वर्तुळात सुरू आहे. या पार्श्वभूमीवर शिवसेना ठाकरे गटाचे नेते संजय राऊत यांनी माध्यमांशी संवाद साधताना आपली भूमिका स्पष्ट केली. राऊत म्हणाले की, शरद पवार हे महाविकास आघाडीतील ज्येष्ठ आणि अनुभवी नेते आहेत. त्यांनी राज्यसभेवर जाण्याची इच्छा व्यक्त केली असल्यास त्याबाबत महाविकास आघाडीतील सर्व घटक पक्ष एकत्र बसून निर्णय घेतील. या विषयावर सामूहिक चर्चा होणे आवश्यक आहे, असे त्यांनी नमूद केले. तसेच, महाविकास आघाडीत सर्वात मोठा पक्ष म्हणून शिवसेनेचा पहिला हक्क असल्याचे आधी मान्य केले पाहिजे, असेही राऊत यांनी स्पष्ट केले. याच मुद्द्यावर सध्या चर्चा सुरू असल्याचे त्यांनी सांगितले. राज्यसभेच्या संभाव्य निवडणुकीच्या पार्श्वभूमीवर महाविकास आघाडीत राजकीय हालचालींना वेग आला असून, अंतिम निर्णय लवकरच जाहीर होण्याची शक्यता आहे.