Nagothane Bridge Issue | नागोठणेचा उड्डाणपूल पुन्हा चर्चेत! सिमेंटच्या प्लेट्सना काचेचा आधार अन्…; व्हिडिओ व्हायरल

रायगड जिल्ह्यातील नागोठणे येथील उड्डाणपूल सध्या सोशल मीडियावर मोठ्या प्रमाणात चर्चेचा विषय ठरला आहे. या पुलावरील सिमेंटच्या प्लेट्सना काचेच्या पट्ट्या आणि एम-सीलच्या साहाय्याने आधार देण्यात आल्याचा व्हिडिओ व्हायरल झाला आहे.

काही काळापूर्वी नागोठणे पुलाला तडे गेल्यामुळे तो वाहतुकीसाठी बंद करण्यात आला होता. आता या काचेच्या आधारामुळे तो पुन्हा एकदा चर्चेत आला आहे. सोशल मीडियावर व्हायरल होत असलेल्या या व्हिडिओमध्ये दाखवल्याप्रमाणे, पुलाला आधार म्हणून लावलेल्या या काचांमागचे नेमके कारण काय, याबाबत संबंधित ठेकेदाराकडून अद्याप कोणतेही अधिकृत स्पष्टीकरण आलेले नाही.

व्हिडिओ करणाऱ्यांच्या म्हणण्यानुसार, हा पूल धोकादायक असून, तो कोसळण्याची शक्यता आहे. अशा परिस्थितीत, या काचांच्या आधारे पूल कोसळणार आहे की नाही, हे समजू शकते असे उपरोधिकपणे म्हटले जात आहे. गणपती उत्सवापूर्वी हा पूल वाहतुकीसाठी खुला करण्याचे आश्वासन देण्यात आले होते, मात्र तेही फोल ठरले आहे. या प्रकारामुळे पुलाच्या सुरक्षिततेबाबत नागरिकांमध्ये प्रश्नचिन्ह निर्माण झाले आहे.