Nagpur Winter Session: पहिल्यांदाच विरोधी पक्ष नेत्याविनाच अधिवेशन, सत्ताधारी अन् विरोधकांमध्ये संघर्ष

नागपूरमध्ये हिवाळी अधिवेशनाला सुरुवात झाली असून, महाराष्ट्राच्या राजकीय इतिहासात प्रथमच हे अधिवेशन दोन्ही सभागृहात विरोधी पक्षनेत्यांविना पार पडत आहे. यावरून सत्ताधारी आणि विरोधकांमध्ये तीव्र संघर्ष सुरू आहे. विधानसभेत विरोधी पक्षनेते पदासाठी आवश्यक असलेल्या एकूण जागांपैकी किमान १० टक्के जागा (२९ आमदार) कोणत्याही विरोधी पक्षाकडे नाहीत. महाविकास आघाडीतील शिवसेना (ठाकरे गट), काँग्रेस आणि राष्ट्रवादी काँग्रेस (शरद पवार गट) यांच्याकडे एकत्रितपणेही पुरेसे संख्याबळ नाही. काँग्रेसने विधान परिषदेसाठी सतेज पाटील यांचे, तर ठाकरे गटाच्या शिवसेनेने विधानसभेसाठी भास्कर जाधव यांचे नाव विरोधी पक्षनेते पदासाठी सुचवले आहे. तथापि, अध्यक्ष आणि सभापतींच्या अखत्यारीत हा निर्णय असल्याने, सध्या तरी दोन्ही सभागृहांना विरोधी पक्षनेते मिळण्याची शक्यता कमी आहे. विरोधी पक्षांनी या मुद्द्यावरून तसेच शेतकरी कर्जमाफी न झाल्याने सरकारच्या चहापानावर बहिष्कार टाकला आहे. यामुळे अधिवेशनाचे कामकाज वादळी ठरण्याची शक्यता आहे.