सरकारच्या चहापानावर विरोधकांचा बहिष्कार

नागपूर येथे उद्यापासून महाराष्ट्र विधानमंडळाचे हिवाळी अधिवेशन सुरू होणार आहे. या अधिवेशनाच्या पूर्वसंध्येला आज सरकारने आयोजित केलेल्या चहापान कार्यक्रमावर विरोधी पक्षांनी बहिष्कार टाकला. सरकारच्या चहापानावर बहिष्कार टाकल्याचे स्पष्टीकरण देताना नेते भास्कर जाधव यांनी आपली भूमिका मांडली.

जाधव यांच्या म्हणण्यानुसार, पूर्वी चहापान कार्यक्रमांमध्ये विरोधकांच्या समस्यांवर चर्चा केली जात असे आणि त्या सोडवण्याबाबत प्रयत्न केले जात असत. मात्र, आता सरकारमध्ये ती सभ्यता राहिलेली नाही. चहापान हा केवळ एक उपचार बनला आहे, त्यामुळे त्यात सहभागी होण्याचा काही अर्थ नाही. या बहिष्कारामुळे यंदाचे हिवाळी अधिवेशन वादळी ठरण्याची शक्यता वर्तवली जात आहे. अधिवेशनाच्या पार्श्वभूमीवर नागपूरमध्ये देवेंद्र फडणवीस, एकनाथ शिंदे आणि अजित पवार यांच्या स्वागताचे फलक लागलेले दिसत आहेत.