Nitesh Rane | आदित्य ठाकरेंना अटक करा, चौकशी करा…दिशा सालियन प्रकरणावर नितेश राणेंची थेट मागणी; उद्धव ठाकरेंच्या आरोपांनाही दिलं प्रत्युत्तर

भाजप नेते नितेश राणे यांनी दिशा सालियन प्रकरणावरून आदित्य ठाकरेंना पुन्हा लक्ष्य केले आहे. दिशा सालियन प्रकरणाची चौकशी सीबीआयकडे सोपवण्यात आल्यानंतर, राणे यांनी आदित्य ठाकरेंना अटक करून चौकशी करणे हाच एकमेव पर्याय असल्याचे म्हटले आहे.

राणे यांनी उद्धव ठाकरे यांच्या चारित्र्यहननच्या आरोपाला उत्तर देताना सांगितले की, हेच म्हणणे पूर्वी माननीय न्यायालयाने फेटाळून लावले होते. न्यायालयाने दिशा सालियन यांच्या वडिलांच्या बाजूने निर्णय दिला होता आणि चौकशी सुरू झाली होती. महाविकास आघाडी सरकारच्या काळात पुरावे नष्ट केले गेले आणि तत्कालीन राज्यकर्त्यांच्या दबावामुळे पोलीस निष्पक्ष चौकशी करू शकले नाहीत, असा दावा त्यांनी केला.

आता देवेंद्र फडणवीस यांच्या नेतृत्वाखालील सरकारमध्ये पोलिसांवर कोणताही दबाव नसल्यामुळे निष्पक्ष चौकशी सुरू आहे. संजय राऊत आणि सुषमा अंधारे यांच्यासारखे नेते पीडित कुटुंबावर दबाव टाकत असल्याचा आरोप राणे यांनी केला. अशा परिस्थितीत, कायद्यानुसार, आरोपी शक्तिशाली असल्यास आणि कुटुंबावर दबाव आणत असल्यास, अटक करून चौकशी करणे आवश्यक असल्याचे राणे यांनी स्पष्ट केले.