Devendra Fadnavis Calls Supriya Sule : मुख्यमंत्री फडणवीसांचा सुप्रिया सुळेंना फोन; शरद पवारांच्या प्रकृतीची घेतली सविस्तर माहिती

मुख्यमंत्री देवेंद्र फडणवीस यांनी राष्ट्रवादी काँग्रेसच्या खासदार सुप्रिया सुळे यांना फोन करून ज्येष्ठ नेते शरद पवार यांच्या प्रकृतीची सविस्तर विचारपूस केली आहे. सध्या शरद पवार यांच्यावर मुंबईतील ब्रीच कँडी रुग्णालयात उपचार सुरू असून, त्यांच्या तब्येतीबद्दल विविध राजकीय नेत्यांकडून माहिती घेतली जात आहे.

मुख्यमंत्री फडणवीस यांनी फोनवरून सुप्रिया सुळे यांच्याशी संवाद साधत शरद पवार यांच्या आरोग्याविषयी जाणून घेतले. यापूर्वी प्रफुल्ल पटेल, विश्वजीत कदम, संजय राऊत आणि छगन भुजबळ यांसारख्या अनेक नेत्यांनी रुग्णालयात प्रत्यक्ष भेट देऊन शरद पवार यांच्या तब्येतीची विचारपूस केली होती.

शरद पवार यांना सुरुवातीला पुणे येथील रुबी हॉल क्लिनिकमध्ये उपचारासाठी दाखल करण्यात आले होते. तेथे दोन दिवसांच्या उपचारानंतर त्यांना डिस्चार्ज देण्यात आला होता. त्यानंतर त्यांना मुंबईत आणण्यात आले आणि ब्रीच कँडी रुग्णालयात पुढील उपचार सुरू आहेत. मुख्यमंत्री फडणवीस यांनी फोनवरून विचारपूस केल्याने राजकारणातील सौहार्दाचे चित्र पुन्हा एकदा समोर आले आहे. राजकीय वर्तुळातून त्यांच्या प्रकृतीसाठी प्रार्थना केली जात आहे.