मोठी बातमी! मृत्यूपूर्वी वैभव चव्हाण यांची कथित ऑडिओ क्लिप व्हायरल; क्रीडा घोटाळ्याचा पर्दाफाश केल्याचा दावा

वैभव चव्हाण यांच्या मृत्यूपूर्वीची एक कथित ऑडिओ क्लिप सध्या व्हायरल झाली आहे. या क्लिपमध्ये त्यांनी स्वतःच्या जीवाला धोका असल्याची भीती व्यक्त केली आहे. क्रीडा कोटा भरतीमध्ये झालेल्या घोटाळ्याचा पर्दाफाश केल्यामुळे आपल्याला मारले जाण्याची शक्यता आहे, असे चव्हाण यांनी म्हटले आहे. या कथित क्लिपमध्ये त्यांनी कुराश संघटनेतील काही पदाधिकाऱ्यांची नावे घेतली आहेत.

चव्हाण यांनी धाराशिव जिल्हा पोलीस भरतीमधील 2024-25 च्या खेळाडू कोट्यातून अर्ज केला होता. नागनाथ विष्णू साबळे या बनावट खेळाडूबाबत त्यांनी क्रीडा आयुक्तालय, बालेवाडी, पुणे येथे तक्रार केली होती. या तक्रारीमुळे महाराष्ट्रातील कुराश संघटनेचा क्रीडा घोटाळा उघडकीस आल्याचे ते म्हणतात. कुराश संघटनेचे अध्यक्ष विठ्ठल अंकुश नागर, सचिव शिवाजी जयवंत साळुंखे आणि कोल्हापूरचे दांपत्य धैर्यशील पुनगावकर, ऋतिक पुनगावकर, त्रिवेणी पुनगावकर यांच्यासह प्रत्येक जिल्ह्यातील संघटनेचे अध्यक्ष व सचिव आपल्या मृत्यूला जबाबदार असतील, असे या ऑडिओ क्लिपमध्ये नमूद आहे. टीव्ही ९ मराठी या ऑडिओ क्लिपच्या सत्यतेची पुष्टी करत नाही.