Special Report | नितीश कुमारांची खेळी, 2024 ची तयारी !-TV9

भाजपशी काडीमोड करताच दुसऱ्याच दिवशी, लालू प्रसादांच्या आरजेडीला सोबत घेऊन नितीश कुमार पुन्हा मुख्यमंत्री झाले आणि काहीच मिनिटांत नाव न घेता, पंतप्रधान नरेंद्र मोदींना 2024 साठी आव्हान दिलं…2014 मध्ये जे आले, ते 2024 नंतर राहणार का ?, असा सवाल करुन 2024 मध्ये मोदींचा आपल्याशी सामना असल्याचं नितीश कुमारांनी सांगण्याचा प्रयत्न केला. नितीश कुमारांना पंतप्रधानपदाची स्वप्नं पडतायत, अशी टीका केंद्रीय मंत्री गिरीराज सिंह यांनी केलीय. आणि आता नितीश कुमारांनी भाजपशी आघाडी तोडून जो डाव टाकलाय, त्याकडे 2024 च्या दृष्टीनं पाहिलं जातंय. बिहारमध्ये लोकसभेच्या 40 जागा आहेत. 2019 मध्ये नितीश कुमारांची जेडीयू, भाजप आणि रामविलास पासवान यांची एलजेपी एकत्र लढले होते, त्यावेळी मोदी लाटेत NDAला 40 पैकी तब्बल 39 जागांवर विजय मिळाला. त्या 39 जागांमध्ये भाजपचे 17 खासदार, जेडीयूचे 16 तर एलजेपीचे 6 खासदार निवडून आले.