‘सासूमुळे वाटणी झाली अन् सासूच वाट्याला आली’; विधीमंडळाच्या पायऱ्यांवर विरोधकांची घोषणाबाजी

मुंबई, 17 जुलै 2023 | आजपासून राज्याचं पावसाळी अधिवेशन सुरू झालं आहे. आज अधिवेशनाच्या पहिल्याच दिवशी विरोधक आक्रमक होताना दिसले. यावेळी विरोधकांनी विधीमंडळाच्या पायऱ्यांवर सरकारविरोधात अनेक घोषणाबाजी केल्या. “घटनाबाह्य आणि कलंकित सरकारचा धिक्कार असो” अशा आशयाचे पोस्टर घेऊन विरोधकांनी सकाळी विधानसभेच्या पायऱ्यावर आंदोलन केले आहे. तसेच “सासूमुळे वाटणी झाली आणि सासूच वाट्याला आली”, “खोके गेले, बोके गेले; सरकारमध्ये ओक्के झाले” अशी जोरदार घोषणाबाजी महाविकास आघाडीच्या आमदारांनी विधिमंडळाच्या पायऱ्यांवर केली.