BJP vs NCP : तुमच्या बापाचा वाडा नाही… दर्ग्याचा वाद मस्तानीपर्यंत… शनिवारवाड्यातील नमाज पठणावरून दादा गट अन् भाजप भिडले?

पुण्यातील ऐतिहासिक शनिवार वाडा पुन्हा एकदा वादाच्या केंद्रस्थानी आला आहे. काही मुस्लिम महिलांनी शनिवार वाड्यात नमाज पठण केल्याचा व्हिडिओ व्हायरल झाल्यानंतर राजकीय वातावरण तापले. भाजप खासदार मेधा कुलकर्णी यांनी या घटनेवर तीव्र आक्षेप घेतला. त्यांनी आपल्या समर्थकांसह गोमूत्र शिंपडून परिसर शुद्ध केल्याचा दावा केला आणि शनिवार वाडा परिसरातील दर्गा हटवण्याची मागणी केली.

या प्रकारानंतर, महायुतीमधीलच अजित पवार गटाच्या नेत्या रुपाली ठोंबरे यांनी मेधा कुलकर्णी यांच्या विरोधात सामाजिक शांतता भंग केल्याप्रकरणी गुन्हा दाखल करण्याची मागणी केली आहे. त्यांनी कुलकर्णींच्या कृतीमुळे हिंदू-मुस्लिम तेढ निर्माण होत असल्याचा आरोप केला. ठोंबरे यांनी शनिवार वाड्यावर छत्रपती शिवाजी महाराजांचा अधिकार असल्याचे म्हटले, कोणा एका व्यक्तीचा नाही, असेही स्पष्ट केले. या घटनेमुळे महायुतीमधील अंतर्गत मतभेद आणि पुणे महापालिका निवडणुकीच्या तोंडावर राजकीय संघर्ष तीव्र झाल्याचे दिसून येत आहे.