एकीकडे दुष्काळाचे सावट, तर दुसरीकडे पुण्यात रात्रभर धो-धो पाऊस, नागरिकांची तारांबळ

पुणे शहरात गेल्या दोन दिवसांपासून सुरू असलेल्या अवकाळी पावसाने जनजीवन विस्कळीत केले आहे. रात्रभर कोसळलेल्या मुसळधार पावसानंतर पहाटेच्या सुमारास पावसाने काहीशी विश्रांती घेतली आहे. पुण्यातील सिंहगड रोड परिसरासह हडपसर, स्वारगेट, कोथरूड आणि शिवाजीनगर या प्रमुख भागांमध्ये काल रात्री जोरदार पाऊस झाला. अचानक आलेल्या पावसामुळे नागरिकांची चांगलीच तारांबळ उडाली, विशेषतः रात्रीच्या वेळी बाहेर असलेल्यांना अडचणींचा सामना करावा लागला.

राज्यात एकीकडे दुष्काळी परिस्थिती असताना पुणे शहरात मात्र अशाप्रकारे अवकाळी पाऊस बरसत असल्याचे चित्र आहे. काल सकाळपासूनच पुणे शहरात पावसाचे आगमन झाले होते आणि रात्रभर पावसाचा जोर कायम होता. आता पावसाने तात्पुरती विश्रांती घेतली असली तरी, हवामान खात्याने दिलेल्या माहितीनुसार, पुढील काही दिवस पुणे आणि आसपासच्या परिसरात पावसाची शक्यता वर्तवण्यात आली आहे. नागरिकांनी सतर्क राहावे, असे आवाहन करण्यात येत आहे.