दिल्लीतील आंदोलकांच्या धरपकडीवर राज ठाकरे आक्रमक; सरकारवर साधला निशाणा

राज ठाकरे यांनी मोदी-शाह या जोडीवर अत्यंत पराकोटीच्या हुकूमशाहीचा आरोप केला आहे. दिल्लीमध्ये आंदोलकांची धरपकड आणि त्यांना चिरडण्याच्या घटनेनंतर त्यांनी हे गंभीर विधान केले. सत्तेच्या मस्तीला विरोध केला म्हणून आंदोलकांना चिरडले जात असेल, तर या बेबंदशाहीला देशातून उखडूनच काढले पाहिजे, असे राज ठाकरे यांनी स्पष्ट केले.

आपल्या टीकेला धार देण्यासाठी, राज ठाकरे यांनी भारतरत्न डॉ. बाबासाहेब आंबेडकर यांचे १९४९ मधील उद्गार उद्धृत केले: “नो नेशन कॅन बी ग्रेटफुल अॅट द कॉस्ट ऑफ इट्स लिबर्टी.” कोणत्याही नेत्याच्या आंधळ्या भक्तीसाठी किंवा त्याच्या तऱ्हेवाईक वागण्याला खतपाणी घालण्यासाठी देशाचे स्वातंत्र्य आणि अभिव्यक्तीची मूल्ये पणाला लावता कामा नयेत, असे ते म्हणाले. मोदी आणि शाह यांच्या मनात आणि डोक्यात अत्यंत पराकोटीची हुकूमशाही बसली असून, या जोडीने देशातील सगळ्या यंत्रणा काबीज केल्या आहेत. त्यांची सत्ता फक्त मूठभर उद्योगपतींच्या हितासाठी राबवली जात आहे, असा आरोपही राज ठाकरे यांनी केला. या बेबंदशाहीला खालपासून वरपर्यंत उखडून टाकण्याची गरज असल्याचे त्यांनी आपल्या ट्विटमध्ये म्हटले आहे.