राजकारणातील पैशांचा ड्रग्सशी संबंध? राज ठाकरेंनी केला खळबळजनक दावा

राज ठाकरे यांनी महाराष्ट्रातील अमली पदार्थांच्या वाढत्या समस्येवर तीव्र चिंता व्यक्त केली आहे. मुंबई, ठाणे आणि नाशिकसारख्या प्रमुख शहरांमध्ये विविध प्रकारचे ड्रग्स सहज उपलब्ध असल्याचे त्यांनी निदर्शनास आणले. अलीकडच्या काळात ठाण्यात ५.५ कोटींचे मॅडरेक्स, साताऱ्यात ड्रग्स फॅक्टरी आणि मुंबईत पावणेतीन कोटींचे ड्रग्स पकडण्यात आले, या घटनांचा त्यांनी उल्लेख केला.

या वाढत्या ड्रग्सच्या समस्येचा आणि राजकारणातील पैशाचा संबंध तपासण्याची मागणी राज ठाकरे यांनी केली आहे. त्यांच्या मते, मुंद्रा पोर्टमार्गे गुजरातकडून हे ड्रग्स महाराष्ट्रात येत आहेत. गेल्या दहा वर्षांपासून ड्रग्सविरोधी धाडी थांबल्या असून, आता शाळांपर्यंतही ड्रग्स पोहोचू लागले आहेत. निवडणुकीवरील खर्च आणि ड्रग्सच्या व्यापारावरील कारवाईचा अभाव यावर त्यांनी केंद्र आणि राज्य सरकारला प्रश्न विचारले आहेत. मुख्यमंत्र्यांकडून मिळणाऱ्या क्लीन चिट संस्कृतीवरही त्यांनी टीका केली.