राज ठाकरे यांचा मुंबईत ईव्हीएमविरोधात विशाल मोर्चा, तिरंगा घेऊन सहभागी होण्याचे आवाहन

महाराष्ट्र नवनिर्माण सेनेचे अध्यक्ष राज ठाकरे यांनी निवडणूक आयोगाच्या कामकाजाविरोधात आणि ईव्हीएम मशीनच्या संदर्भात ४ तारखेला मुंबईत एका विशाल मोर्चाचे आवाहन केले आहे. हा मोर्चा मुंबईतील रिचर्डसन क्रुडास, भायखळा येथून निघून मुंबई महानगरपालिकेसमोर सभेमध्ये रूपांतरित होईल. सकाळी १० वाजताची वेळ निश्चित करण्यात आली असून, साधारणपणे ११ ते ११.३० पर्यंत मोर्चा सुरू होईल.

राज ठाकरे यांनी सांगितले की, हा मोर्चा कुठच्याही राजकीय पक्षाच्या विरोधात नसून, निवडणूक आयोगाच्या गेल्या काही वर्षांतील कार्यपद्धतीविरोधात आहे. या मोर्च्यामध्ये कुठल्याही राजकीय पक्षाचे झेंडे नसतील. सर्वांच्या हातात केवळ तिरंगा असेल, कारण हा विषय देशाची लोकशाही आणि संविधान वाचवण्याचा आहे. त्यांनी सर्व राजकीय पक्षांना, सत्ताधारी पक्षांसह, या मोर्चात सहभागी होण्याचे आवाहन केले आहे. ईव्हीएम संदर्भातील सविस्तर माहिती आणि पुरावे ४ तारखेच्या सभेमध्ये सादर केले जातील, असेही त्यांनी नमूद केले.