मतदारांची नावे वगळल्याचा आरोप; ठाकरे बंधूंचा 4 ऑक्टोबरला निवडणूक आयोगाविरोधात मोर्चा

शिवसेना (उद्धव बाळासाहेब ठाकरे) नेते संजय राऊत यांनी निवडणूक आयोगाच्या कार्यपद्धतीवर गंभीर आरोप केले आहेत. आयोगाच्या भ्रष्ट आणि लोकशाहीविरोधी कृतींविरोधात ४ ऑक्टोबर रोजी उद्धव ठाकरे आणि राज ठाकरे यांच्या नेतृत्वाखाली एक भव्य मोर्चा काढण्यात येणार असल्याची घोषणा त्यांनी केली. आयोगाकडून भारतीय जनता पक्षाला (भाजप) फायदा होईल, अशा प्रकारचे निर्णय घेतले जात असल्याचा दावा राऊत यांनी केला.

मुख्य निवडणूक आयुक्त ज्ञानेश कुमार यांच्यावर विशेषतः टीका करत राऊत यांनी म्हटले की, त्यांच्या कृतींमुळे लोकशाहीची हत्या होत असून, स्वातंत्र्याची गळचेपी केली जात आहे. देशभरातून १३ कोटी, तर महाराष्ट्रातून २ कोटी मतदारांची नावे बेकायदेशीरपणे वगळण्यात आल्याचा आरोप त्यांनी केला. याविरोधात देशभर संतापाचे वातावरण असून, मुंबईतून या आंदोलनाची मुख्य सुरुवात होणार आहे. हा मोर्चा महाराष्ट्राची ताकद, संताप आणि रोष दाखवणारा असेल, असे राऊत यांनी सांगितले. काँग्रेस, राष्ट्रवादी काँग्रेससह सर्व राजकीय पक्षांना एकत्र येण्याचे आवाहन ठाकरे बंधूंनी केले आहे.