Jalgaon : रक्षा खडसेंच्या पेट्रोल पंपावर दरोडा, बंदूक दाखवली अन्… लाखोंची रोकड लुटणारे ते 5 जणं कोण?

जळगावातून एक धक्कादायक बातमी समोर आली आहे. खासदार रक्षा खडसे यांच्या मालकीच्या पेट्रोल पंपावर दरोडा टाकण्यात आला असून, या प्रकरणी पोलिसांनी पाच संशयितांना ताब्यात घेतले आहे. जळगावातील या घटनेने परिसरात खळबळ उडाली आहे. मिळालेल्या माहितीनुसार, दरोडेखोरांनी पेट्रोल पंपावर धाडसी हल्ला करत बंदुकीचा धाक दाखवला आणि त्यांनी पंपावरील लाखांपेक्षा जास्त रक्कम लुटून नेली.

एवढेच नव्हे, तर दरोडेखोरांनी सीसीटीव्ही कॅमेऱ्याचे डीव्हीआर (डिजिटल व्हिडिओ रेकॉर्डर) देखील लंपास केले, ज्यामुळे तपासात अडथळा निर्माण करण्याचा प्रयत्न करण्यात आला. घटनेची माहिती मिळताच पोलिसांनी तात्काळ तपास सुरू केला. पोलिसांनी या दरोड्याप्रकरणी पाच संशयितांना ताब्यात घेतले आहे. सध्या त्यांची कसून चौकशी सुरू असून, या घटनेमागे कोणाचा हात आहे आणि चोरीला गेलेली रक्कम कुठे आहे, याचा पोलीस शोध घेत आहेत. या दरोड्यामुळे परिसरातील सुरक्षा व्यवस्थेवर प्रश्नचिन्ह निर्माण झाले आहे.