दुष्काळाने शेतकरी हतबल! जनावरे विकण्याची वेळ, रोहित पवार पाहणीसाठी गेले असताना शेतकऱ्यान मांडली व्यथा

अक्कलकोट तालुक्यातील जेऊर गावातील शेतकरी सदाशिव कनोजे यांच्या शेतात राष्ट्रवादी काँग्रेसचे आमदार रोहित पवार यांनी नुकतीच पाहणी केली. दिवाळीच्या दिवसांतही दुष्काळामुळे राज्यातील शेतकऱ्यांसमोर उभ्या ठाकलेल्या गंभीर परिस्थितीचे दर्शन यावेळी घडले. कनोजे यांनी मिरची पिकासाठी टँकरने पाणी वापरूनही रोग पडल्याने झालेले नुकसान आणि दोन एकर ऊसाचे पीक जळून गेल्याने आलेले आर्थिक संकट रोहित पवारांसमोर मांडले. या संकटामुळे कनोजे कुटुंबीयांनी आपली जनावरे कवडीमोल भावाने विकली.

एक लाखाची म्हैस चाळीस हजारात आणि ऐंशी हजाराची गाय तीस-पस्तीस हजारात विकावी लागल्याची व्यथा सांगताना त्यांना आणि त्यांच्या मुलीला अश्रू अनावर झाले. मुलाने बहिणींच्या शिक्षणासाठी बारावीनंतर शिक्षण सोडल्याचे आणि मुलीला शिकण्याची इच्छा असूनही पैशाअभावी ते शक्य नसल्याचे पाहून रोहित पवारही भावनिक झाले. शेतकऱ्यांच्या जीवनातील हा बिकट प्रसंग पाहता, सरकारने तातडीने मदत करण्याची मागणी रोहित पवारांनी केली.