हार-जीत खुल्या मनाने मान्य…; रूपाली चाकणकरांचं मोठं विधान

रुपाली चाकणकर यांनी निवडणुका म्हणजे हार-जीतचा खेळ असल्याचे सांगत पुणे आणि पिंपरी-चिंचवडच्या जनतेने दिलेला कौल खुल्या मनाने स्वीकारल्याचे म्हटले आहे. ईव्हीएमवर घेण्यात आलेल्या आक्षेपांवर बोलताना, त्यांच्याकडे ईव्हीएमबाबत कोणतीही तक्रार नसल्याचे त्यांनी स्पष्ट केले. मात्र, काही ठिकाणी बोटाची शाई पुसून परत मतदान करण्यासारखे प्रकार घडल्याचे त्यांनी नमूद केले. ज्या उमेदवारांनी ईव्हीएममुळे पराभव झाल्याचा दावा केला, त्यांना न्यायालयीन प्रक्रियेद्वारे न्याय मागण्याचा सल्ला चाकणकर यांनी दिला. पक्षांतर्गत टीका करण्याऐवजी प्रचारात ऊर्जा वापरली असती, तर कदाचित विजय झाला असता, असे मतही त्यांनी व्यक्त केले.

महानगरपालिका निवडणुकीत दोन्ही राष्ट्रवादी वेगवेगळ्या चिन्हांवर लढल्याने मतांवर मोठा परिणाम झाल्याचे दिसून आले. या अनुभवातून शिकत, आगामी जिल्हा परिषद आणि पंचायत समिती निवडणुका एकाच चिन्हावर, शक्यतो घड्याळाच्या चिन्हावर लढण्याबाबत पक्षात चर्चा सुरू असल्याचे चाकणकर यांनी सांगितले. यामुळे मतदारांचा गोंधळ टळेल आणि पक्षाला फायदा होईल, असा विश्वास त्यांनी व्यक्त केला. क्रॉस व्होटिंगसारख्या प्रकारांची दखल घेऊन अजित पवार कारवाई करतील, असेही त्यांनी नमूद केले.