सहर शेख यांच्या ताजमहाल पोस्टने वाद पेटला; मुंब्र्यात भाजपचे आक्रमक आंदोलन!

एमआयएमच्या नगरसेविका सहर शेख एका वादग्रस्त पोस्टमुळे पुन्हा चर्चेत आल्या आहेत. सहर शेख यांनी आपल्या सोशल मीडिया पोस्टमध्ये औरंगजेबाचे उदात्तीकरण केल्याचा आरोप आहे. त्यांनी मुघल राजवटीत बांधण्यात आलेल्या ऐतिहासिक वास्तूंची स्तुती केली आहे. या पोस्टमध्ये सहर शेख यांनी ताजमहालचा फोटो शेअर करत म्हटले आहे की, सात आश्चर्यांपैकी एक असलेला ताजमहाल मुघलांनी बांधला होता. त्यांच्या या पोस्टमुळे राजकीय वर्तुळात तीव्र प्रतिक्रिया उमटल्या आहेत. भाजप आमदार नितेश राणे यांनी यावर तीव्र शब्दांत टीका केली आहे. राणे यांनी सहर शेख यांना पाकिस्तानात पाठवा अशी मागणी केली आहे. या घटनेच्या निषेधार्थ मुंब्रामध्ये भाजपने आक्रमक भूमिका घेतली आहे.

भाजपच्या युवा मोर्चाकडून सहर शेख यांच्या निषेधार्थ आंदोलन करण्यात आले आहे. विरोधकांनी म्हटले आहे की, जर मुघलांची एवढी आठवण येत असेल तर त्यांनी पाकिस्तानात निघून जावे. हे हिंदू राष्ट्र आहे, छत्रपती शिवरायांनी मुघलांना गाडून हिंदवी स्वराज्याची स्थापना केली होती. त्यामुळे ही कोणाच्या अब्बाची पाकिस्तान नाही, हे लक्षात ठेवावे, असे विरोधकांनी म्हटले आहे. यामुळे राज्यातील राजकीय वातावरण तापले आहे.