मोठी बातमी! शिवसेना पक्ष चिन्ह सुनावणीच्या आठवडाभर आधीच… शहांचं नाव घेत बड्या नेत्याचं खळबळजनक विधान

संजय राऊत यांनी धनुष्यबाण चिन्ह हे बाळासाहेब ठाकरेंच्या शिवसेनेचेच असल्याचे ठामपणे सांगितले आहे. या चिन्हासोबत एकनाथ शिंदे आणि अमित शाह यांचा काहीही संबंध नसल्याचा टोला त्यांनी लगावला. हे चिन्ह निवडणूक आयोगाच्या मदतीने नव्हे, तर कारस्थानाने चोरले गेल्याचा आरोप राऊतांनी केला. या चोरीचे नेतृत्व अमित शाह यांनी केल्याचेही ते म्हणाले. उद्धव ठाकरे यांनी धनुष्यबाण चिन्ह गोठवण्याची मागणी केली आहे, कारण चोरांच्या हातात बाळासाहेबांचे धनुष्यबाण असणे हे महाराष्ट्रासाठी अत्यंत अप्रतिष्ठेचे असल्याचे त्यांचे मत आहे. त्यामुळे आधी चिन्ह गोठवावे आणि मग निर्णय घ्यावा, अशी त्यांची भूमिका आहे.

यावर खासदार नरेश मस्के यांनी संजय राऊत यांच्यावर जोरदार पलटवार केला आहे. उद्धव ठाकरे यांनी हार स्वीकारल्यामुळेच चिन्ह गोठवण्याची भाषा करत असल्याचा हल्लाबोल मस्के यांनी केला. मुळात बाळासाहेबांनी प्रचंड मेहनतीने शिवसेनेला जन्म दिला. आता हे चिन्ह गोठवा असे म्हणणे दुर्दैवी आहे. त्यांना शेवटी काँग्रेसमध्ये विलीन होऊन पंजा निशाणी वापरायची असल्यानेच अशा प्रकारची मागणी ते करत आहेत, असा आरोप नरेश मस्के यांनी केला. एकनाथ शिंदे यांनी आपली शिवसेना बहुमतात असल्याचे सिद्ध केले आहे, त्यामुळे उद्धव ठाकरे हताश होऊन अशा पद्धतीच्या दुर्दैवी मागण्या करत आहेत, असेही मस्के यांनी नमूद केले.