Sanjay Raut Full Press : त्यांनी अमेरिकेत जाऊन ट्रम्पची भांडी घासावी; राऊतांची खरमरीत टीका

संजय राऊत यांनी पत्रकार परिषदेत विविध राजकीय मुद्द्यांवर भाष्य केले. चंद्रपूरमध्ये भाजपसोबत झालेल्या युतीसंदर्भात उद्धव ठाकरे यांचा कोणताही संबंध नसल्याचे त्यांनी स्पष्ट केले. चंद्रपूरमधील स्थानिक नेत्यांच्या निर्णयाला पक्षाचा पाठिंबा नसल्याचे ते म्हणाले.

परभणीतील महापौर निवडणुकीत शिवसेनेचा (उद्धव बाळासाहेब ठाकरे गट) मुस्लिम महापौर निवडून आल्यानंतर, एकनाथ शिंदे यांच्या टीकेला राऊत यांनी प्रत्युत्तर दिले. शिंदेंना “अभ्यास करा” असा सल्ला देत, भाजपमध्येही मुस्लिम नगरसेवक असल्याची आठवण करून दिली. एकनाथ शिंदे यांच्यासारख्या गद्दारांपेक्षा निष्ठावान मुस्लिम पदाधिकारी अधिक महत्त्वाचा असल्याचे राऊत यांनी म्हटले.

राऊत यांनी मोदी सरकारच्या अमेरिका धोरणांवरही टीका केली. अमेरिकेसोबतच्या व्यापार करारामुळे देश गुलाम बनत असल्याचे ते म्हणाले. राहुल गांधी देशाच्या स्वातंत्र्यासाठी आणि लोकशाहीसाठी लढत आहेत, तर ज्यांना गुलामी करायची आहे, त्यांनी अमेरिकेत जाऊन डोनाल्ड ट्रम्प यांची भांडी घासावीत, असे खळबळजनक विधान त्यांनी केले.