District Bank Election Result 2026 : अवघ्या एका मताने फिरला निकाल; संजयकाका पाटील विजयी, सुमनताई पाटील पराभूत

सांगली जिल्हा मध्यवर्ती सहकारी बँकेच्या बहुप्रतिक्षित संचालक मंडळाच्या निवडणुकीचा निकाल अखेर जाहीर झाला आहे. यात माजी खासदार संजयकाका पाटील यांनी अटीतटीच्या लढतीत विजय मिळवला आहे. अवघ्या एका मताने त्यांनी माजी आमदार सुमनताई पाटील यांचा पराभव केला, ज्यामुळे संपूर्ण जिल्ह्याचे लक्ष लागलेल्या या निवडणुकीत मोठी उलथापालथ झाली आहे.

एकूण २१ जागांपैकी १५ जागा बिनविरोध झाल्या होत्या, त्यामुळे उर्वरित सहा जागांसाठी झालेल्या मतदानात चुरस दिसून आली. यापैकी एका जागेसाठी संजयकाका पाटील आणि सुमनताई पाटील यांच्यात थेट लढत होती. मतमोजणीनंतर संजयकाका पाटील यांना ३९ मते मिळाली, तर त्यांच्या प्रतिस्पर्धी सुमनताई पाटील यांना ३८ मतांवर समाधान मानावे लागले. या एका मताच्या फरकाने पाटील यांनी विजय संपादन करत जिल्हा बँकेवरील आपली पकड कायम ठेवली.

या विजयामुळे संजयकाका पाटील यांच्या समर्थकांमध्ये मोठा उत्साह असून, सांगली जिल्ह्यात जल्लोषाचे वातावरण आहे. दुसरीकडे, सुमनताई पाटील आणि रोहित पाटील यांच्यासाठी हा एक मोठा धक्का मानला जात आहे.