Phaltan Doctor Death : ती आली, तिनं रूम 114 चं दार उघडलं अन्… मृत डॉक्टरची अशी झाली हॉटेलमध्ये एन्ट्री, CCTV समोर

फलटणमधील डॉक्टर महिलेच्या आत्महत्येप्रकरणी एक महत्त्वाची अपडेट समोर आली आहे. मृत डॉक्टर तरुणी हॉटेलमध्ये प्रवेश करत असतानाचे सीसीटीव्ही फुटेज आता सार्वजनिक झाले आहे. हॉटेल मालकाने त्यांच्यावरील आरोपानंतर हे फुटेज जाहीर केल्याची माहिती मिळत आहे. या प्रकरणात आत्महत्येच्या घटनेनंतर अनेकांनी आरोप-प्रत्यारोप सुरू केले होते. यामध्ये सुषमा अंधारे यांनी स्थानिक हॉटेल व्यावसायिकांवर विविध आरोप केले होते.

पीडित डॉक्टर महिला घरात असताना ती हॉटेलमध्ये कशी आली, तिला रात्री उशिरा खोली कशी दिली गेली आणि तिला बाहेरून आणून मारले तर नसेल ना, असे अनेक सवाल त्यांनी उपस्थित केले होते. या आरोपानंतर हॉटेल मालकाने स्वतः सीसीटीव्ही फुटेज जाहीर केले आहे. यामध्ये मृत डॉक्टर हॉटेलमध्ये प्रवेश करताना आणि त्यानंतर तिच्या खोलीत जाताना दिसत आहे. हॉटेल मालकाने या प्रकरणाची सखोल चौकशी व्हावी अशी मागणी केली आहे.